ನಗರ ಪ್ರವೇಶಿಸಿದ್ದ ಕಾಡುಕೋಣ ಸಾವನ್ನಪ್ಪಲು ಕಾರಣವೇನು.? ನಿಜವಾಗ್ಲೂ ನಡೆದಿದ್ದೇನು.?

ಮಂಗಳೂರು: ಕಾಡಿನಿಂದ ನಾಡು ಪ್ರವೇಶಿಸಿದ್ದ ಕಾಡುಕೋಣ ಮಂಗಳೂರು ನಗರದ ಜನತೆಯಲ್ಲಿ ಆತಂಕ ಮೂಡಿಸಿತ್ತು.

ಈ ಹಿನ್ನಲೆಯಲ್ಲಿ ಅರಣ್ಯ ಇಲಾಖೆ ಅಧಿಕಾರಿಗಳು ಅರಿವಳಿಕೆ ಮದ್ದು ನೀಡಿ ಸೆರೆ ಹಿಡಿದಿದ್ದರು. ಆದ್ರೆ ಸೆರೆಯಾದ ಕಾಡುಕೋಣ ದಿಢೀರ್ ಸಾವನ್ನಪ್ಪಿದ್ದ ಹಿನ್ನಲೆ ಸಾರ್ವಜನಿಕ ವಲಯದಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗಿತ್ತು.

ಇದೀಗ ಕಾಡು ಕೋಣದ ಸಾವಿನ ವಿಚಾರವಾಗಿ ಮಂಗಳೂರು ಪಿಲಿಕುಳ ಜೈವಿಕ ಉದ್ಯಾನವನದ ವೈಜ್ಞಾನಿಕ ಅಧಿಕಾರಿ ವಿಕ್ರಂ ಸ್ಪಷ್ಟನೆ ನೀಡಿದ್ದಾರೆ.

“ಮಂಗಳೂರು ನಗರ ಪ್ರವೇಶಿಸಿದ ಕಾಡುಕೋಣಕ್ಕೆ ಅರೆವಳಿಕೆ ನೀಡಿದ ಪ್ರಮಾಣ ಜಾಸ್ತಿಯಾಗಿ ಸಾವನಪ್ಪಿದೆಯೆಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿ ಬಿಡಲಾಗಿದೆ.

ಈಗಾಗಲೇ ಸೆರೆ ಹಿಡಿದ ಕಾಡು ಕೋಣವು ಬೆಳಗಿನಿಂದ ಓಡಾಡಿ ಕಡೆಗೆ ಸುಸ್ತಾಗಿ ಒಂದು ಕಡೆ ನಿಂತಿದ್ದರಿಂದ ಅರೆವಳಿಕೆ ಮದ್ದು ಕೊಡಲು ಸಾದ್ಯವಾಯಿತು.

ವನ್ಯ ಜೀವಿಗಳಿಗೆ ಅವುಗಳ ಭಾರದ ಲೆಕ್ಕದಲ್ಲಿ ಅರೆವಳಿಕೆ ಮದ್ದನ್ನು ನೀಡಬೇಕಾಗುತ್ತದೆ. ನಿನ್ನೆಯ ಕಾಡುಕೋಣದ ಭಾರ ಸುಮಾರು 600-750 ಕೆ. ಜಿ. ಎಂದು ಅಂದಾಜಿಸಿ ಅದಕ್ಕೆ ತಕ್ಕಂತೆ ಅರೆವಳಿಕೆ ಮದ್ದನ್ನು ಚುಚ್ಚಲಾಗಿದೆ.

ಅರೆವಳಿಕೆ ಮದ್ದು ಹೆಚ್ಚಾಗುವ ಮತ್ತು ಕಡಿಮೆಯಾಗುವ ಪ್ರಮೇಯ ಬರುವುದಿಲ್ಲ. ಕಡಿಮೆಯಾದರೆ ಪ್ರಾಣಿಗೆ ಅರೆವಳಿಕೆ ಆಗುವುದಿಲ್ಲ, ಹೆಚ್ಚಾದರೆ ಅದು ಸಹಜ ಸ್ಥಿತಿಗೆ ಬರಲು ತುಂಬಾ ಸಮಯವಾಗುತ್ತದೆ.

ನಿನ್ನೆಯ ಪರಿಸ್ಥಿತಿ ಬೇರೆಯಾಗಿದ್ದು ಒಂದು ಕಡೆ ಪ್ರಾಣಿಯನ್ನು ರಕ್ಷಿಸುವ ಮತ್ತು ಇನ್ನೊಂದು ಕಡೆ ಜನರ ಪ್ರಾಣ ರಕ್ಷಿಸುವ ಜವಾಬ್ದಾರಿ ಅಧಿಕಾರಿಗಳಿಗಿದ್ದು,

ಒಂದು ವೇಳೆ ಅರೆವಳಿಕೆ ನೀಡದೆ ಇದ್ದ ಪಕ್ಷದಲ್ಲಿ ಪ್ರಾಣಿ ಜನನಿಬಿಡ ಪ್ರದೇಶದಲ್ಲಿ ಓಡಾಡಿದರೆ ಏನಾಗುತ್ತೆಂದು ಊಹಿಸಲು ಕಷ್ಟ?

ಸಾಮಾನ್ಯವಾಗಿ ಮೃಗಾಲಯದಲ್ಲಿ ಪ್ರಾಣಿಗಳಿಗೆ ಅರೆವಳಿಕೆ ಮದ್ದು ಚುಚ್ಚಿದ ನಂತರ ಚಿಕಿತ್ಸೆಗಳನ್ನು ಮುಗಿಸಿ ಅವುಗಳು ಎಚ್ಚರ ಆಗುವರೆಗೆ ಆರೈಕೆ ನೀಡಲಾಗುತ್ತದೆ.

ಸಹಜ ಸ್ಥಿತಿಗೆ ಬಂದ ನಂತರ ಅವುಗಳನ್ನು, ಸುತ್ತು ಬಂದ್ ಇರುವ ವಾಹನದಲ್ಲಿ ಇರಿಸಿ ಸಾಗಿಸಲಾಗುತ್ತದೆ.

ದಾರಿ ಮಧ್ಯೆ ಅವುಗಳ ಮೈಮೇಲೆ ನೀರನ್ನು ಸಿಂಪಡಿಸುತ್ತಾ, ಕುಡಿಯಲು ನೀರು ಕೊಡುತ್ತಾ ರಾತ್ರಿ ಸಮಯದಲ್ಲಿ ಸೂರ್ಯನ ಬಿಸಿಲು ಇಲ್ಲದಾಗ ಸಾಗಿಸುವುದು ರೂಢಿ.

ಹಾಗಾಗಿ ನಗರಕ್ಕೆ ಪ್ರವೇಶಿಸಿದ್ದ ಕಾಡುಕೋಣದ ಪ್ರಕರಣದಲ್ಲಿ ಅಂತಹ ಯಾವುದೇ ಕ್ರಮವನ್ನು ಪಾಲಿಸುವುದು ಕಷ್ಟ ಮತ್ತು ವ್ಯವಸ್ಥೆಯೂ ಇರಲಿಲ್ಲ.

ತುರ್ತಾಗಿ ಎರಡು ಗಂಟೆಗಳ ಲಾರಿ ಪ್ರಯಾಣ ಹಗಲು ಹೊತ್ತೆ ಅಧಿಕಾರಿಗಳಿಗೆ ಅನಿವಾರ್ಯವಾಗಿತ್ತು. ಅರೆವಳಿಕೆ ನೀಡಿದ ನಂತರ ಸಾಗಾಣೆ ಪ್ರಾರಂಭವಾದಾಗ ಉಸಿರಾಟ ಸರಿಯಾಗಿ ನಡೆಯುತ್ತಿತು.

ಕಾಡುಕೋಣವು ಗುಂಪಿನಿಂದ ಬೇರೆಯಾದ ಒತ್ತಡದಯಲ್ಲಿದ್ದು ಮತ್ತು ಒಂಟಿಯಾಗಿ ಬೆದರಿದ್ದು ಮತ್ತು ಓಡೋಡಿ ಸುಸ್ತಾಗಿರುವುದರಿಂದ ಹೃದಯಕ್ಕೆ ಆಮ್ಲಜನಕ ಕಡಿಮೆಯಾಗಿ,

capture myopathy ಯಿಂದ ಜೀವಕ್ಕೆ ಕುತ್ತು ಬಂದಿರಬಹುದು ಎಂದು ಪಿಲಿಕುಳು ಜೈವಿಕ ಉದ್ಯಾನವನದ ಹಿರಿಯ ವೈಜ್ಞಾನಿಕ ಅಧಿಕಾರಿ ವಿಕ್ರಂ ಸ್ಪಷ್ಟನೆ ನೀಡಿದ್ದಾರೆ.