ಉಡುಪಿ ಅನ್ನದಾತರ ಪರಿಶ್ರಮ ವಲಸೆ ಕಾರ್ಮಿಕ ಭೂಪರಿಗೆ ತಿಳಿಯದೆ ಹೋಗಿದ್ದು ದುರಂತ ಸಂಗತಿ..

ಉಡುಪಿ: ಕೊರೊನಾ ಸೋಂಕು ಇಡೀ ವಿಶ್ವವನ್ನೇ ತಲ್ಲಣಗೊಳಿಸಿದೆ. ಈ ಮಹಾಮಾರಿಯಿಂದಾಗಿ ಹಸಿವೆಯಿಂದ ಬಡಜನರು, ಕೂಲಿ ಕಾರ್ಮಿಕರು ಕಂಗೆಟ್ಟು ಹೋಗಿದ್ದಾರೆ.

ಎಲ್ಲಾ ಕಡೆಯಲ್ಲಿಯೂ ಕೊರೊನಾಸುರ ಅಟ್ಟಹಾಸದಿಂದ ಮರೆಯುತ್ತಿದ್ದಾನೆ. ಅಮೂಲ್ಯ ನರ ಜೀವಗಳನ್ನು ವಧಿಸುತ್ತಿದ್ದಾನೆ.

ಕೊರೊನಾಸುರನ ಸಂಹಾರ ನಡೆಸಲು ದೇಶದೆಲ್ಲೆಡೆ ಇನ್ನಿಲ್ಲದ ಪ್ರಯತ್ನಗಳು ನಡೆಯುತ್ತಿವೆ.

ಇತ್ತ ಸರಕಾರದ ನಿಷೇಧಾಜ್ಞೆ ಜಾರಿಯಲ್ಲಿದ್ದ ಕಾರಣ, ಕೃಷ್ಣನಗರಿ ಉಡುಪಿಯಲ್ಲಿ ಸಾವಿರಾರು ವಲಸೆ ಕಾರ್ಮಿಕರು ಅತಂತ್ರರಾಗಬೇಕಾಯಿತು.

ಅವರ ರಕ್ಷಣೆಗೆ ಉಡುಪಿಯ ಸಂಘ ಸಂಸ್ಥೆಗಳು, ದಾನಿಗಳು, ಸಮಾಜಸೇವಕರು ನೆರವಿಗೆ ಧಾವಿಸಿ ಬಂದರು.

‘ಅನ್ನಬ್ರಹ್ಮನ ನಾಡಿನಲ್ಲಿ ಅನ್ನಕ್ಕೆ ಕೊರತೆ ಇಲ್ಲ’ ಎನ್ನುವಷ್ಟರ ಮಟ್ಟಿಗೆ, ಹಸಿದವರಿಗೆ ಆಹಾರ ಪೊಟ್ಟಣಗಳನ್ನು ನಿತ್ಯವು ಎರಡು ಹೊತ್ತು ವಿತರಿಸುವ ಕಾರ್ಯವು ನಡೆಯುತ್ತಿದೆ.

ಇವರೆಲ್ಲರು ಯಾವೊಂದು ಫಲಾಪೇಕ್ಷೆ ಇಲ್ಲದೆ ಮಾಡಿರುವ ಸೇವಾಕಾರ್ಯವು ಪ್ರಶಂಸನೀಯ.

ದೇವರ ಕೃಪೆಗೆ ಒಳಪಟ್ಟಿರುವಂತದ್ದು. ಇವರೆಲ್ಲರ ಸೇವಾಕಾರ್ಯ ಕಂಡಾಗ “ತಾವು ಹಸಿದರು ಪರವಾಗಿಲ್ಲ..! ಬಡವರು ಹಾಗೂ ವಲಸೆ ಕಾರ್ಮಿಕರು ಹಸಿಯಬಾರದು” ಧ್ಯೇಯ ಇವರದಾಗಿದೆ ಎಂದು ಅಂತರಾತ್ಮವು ನುಡಿಯತ್ತದೆ.

ನಿಸ್ವಾರ್ಥತತೆ, ಹೃದಯ ಶ್ರೀಮಂತಿಕೆ, ದಯಾಗುಣವು ನಮ್ಮ ಉಡುಪಿಯ ಅನ್ನದಾತರದು. ಆದರೆ ಇವರ ಸೇವೆಯ ಹಿಂದಿರುವ ಅಹರ್ನಿಶಿ ಪರಿಶ್ರಮವು ಕೆಲವು ವಲಸೆ ಕಾರ್ಮಿಕ ಭೂಪರಿಗೆ ತಿಳಿಯದೆ ಹೋಗಿದೆ.

ಇದೊಂದು ದುರಂತದ ಸಂಗತಿ…!! ಎಂದು ನಿತ್ಯಾನಂದ ಒಳಕಾಡು ಅವರು ಹೇಳಿದ್ದಾರೆ.

“ಉಣ್ಣುವ ಹಕ್ಕು ನಮಗಿದೆ, ಆದರೆ ಬಿಸಾಡುವ ಹಕ್ಕು ನಮಗಿಲ್ಲ..!!” ಎಸೆದ ಅನ್ನದಲ್ಲಿ ನೇಗಿಲಯೋಗಿ ಬೆವರಿಳಿಸಿದ ಶ್ರಮವಿದೆ.

ಹಾಗಾಗಿ ಯಾವತ್ತೂ ಆಹಾರದ ಪೋಲು ಸಲ್ಲದು..! ಉಡುಪಿ ನಗರದ ಅಲ್ಲಲ್ಲಿ ಆಹಾರ ಇರುವ ಆಹಾರದ ಪೊಟ್ಟಣಗಳು ವಲಸೆ ಕಾರ್ಮಿಕರು ಹಾಗೆಯೇ ಎಸೆದಿರುವುದು..! ಅರ್ಧ ತಿಂದುಂಡು ಎಸೆದಿರುವುದು ಕಂಡು ಬಂದಿದೆ.

ಹೀಗೆ ಒಂದು ದಿನ ಅಲ್ಲ..! ಕಳೆದ ಒಂದು ತಿಂಗಳಿಂದ ಕಂಡು ಬರುತ್ತಿದೆ. ಚೆಲ್ಲಾಪಿಲ್ಲಿಯಾಗಿ ಅವುಗಳನ್ನು ನೋಡಿದಾಗ ಅನ್ನದ ಬೆಲೆ ತಿಳಿದವನಿಗೆ ಹೃದಯ ಕಿತ್ತು ಬರುತ್ತಿದೆ.

ವಲಸೆ ಕಾರ್ಮಿಕರೇ ಆ ಅನ್ನದ ಹಿಂದೆ ನಮ್ಮ ಉಡುಪಿಯ ಅನ್ನದಾತ ಬಂಧುಗಳ ಶ್ರಮ ಅಡಗಿದೆ, ಸ್ವಲ್ಪ ತಿಳಿದುಕೊಳ್ಳಿ.

ನಿಮಗೆ ನೀಡಲ್ಪಡುವ ಆಹಾರವು ಪರಿಶುದ್ಧ ಆಹಾರ, ನುರಿತ ಬಾಣಸಿಗರಿಂದ ತಯಾರಿಕೆ ಕಂಡಿರುವುದು. ಅಧಿಕಾರಿ ವರ್ಗಗಳಿಂದ ಆಹಾರದ ಗುಣಮಟ್ಟ ಪರಿಶೀಲನೆಗೆ ಒಳಪಟ್ಟಿರುವುದು.

ನಸುಕಿನ ಜಾವ ನಾಲ್ಕು ಗಂಟೆಗೆ ಬಾಣಸಿಗರು, ಅಡಿಗೆ ತಯಾರಿ ನಡೆಸುತ್ತಾರೆ. ಮಹಿಳೆಯರು, ಕಾರ್ಯಕರ್ತರು ಆಹಾರದ ಪೊಟ್ಟಣ ಕಟ್ಟುತ್ತಾರೆ.

ಅಷ್ಟೇ ಅಲ್ಲ ಸಾಮಾಜಿಕ ಅಂತರ ಕಾಯ್ದುಕೊಂಡು, ಆರೋಗ್ಯ ಸುರಕ್ಷಾ ವಿಧಾನ ಪಾಲನೆ ಮಾಡಿಕೊಂಡು, ನೀವು ಹಸಿದು ಕುಳಿತಿರುವ ಸ್ಥಳಕ್ಕೆ ಬಂದು, ನಿಮ್ಮ ಹಸಿದಿರುವ ಉದರಗಳ ತಣಿಸುತ್ತಿದ್ದಾರೆ.

ಆವಾಗಲೇ ಅವರಿಗೆ ಸಂತೃಪ್ತಿ. ಇವರೆಲ್ಲರು ಊಟ ಮಾಡುವುದು ನಿಮ್ಮೆಲ್ಲರ ಹೊಟ್ಟೆ ತುಂಬಿದ ಬಳಿಕವೇ. ಅದುವರೆಗೆ ಅನ್ನದಾತರು ಹಸಿದ ಹೊಟ್ಟೆಯಲ್ಲಿಯೇ ನಿಮಗಾಗಿ ಶ್ರಮಿಸುತ್ತಿರುತ್ತಾರೆ.

ಅವರು ಊಟ ಮಾಡುವಾಗ ಸಮಯ ಮಧ್ಯಾಹ್ನ 3 ಗಂಟೆ ಕಳೆಯಬಹುದು.

ಉಡುಪಿಯ ಸೇವಾಕರ್ತರು ಮಾಡುವ ಸೇವೆ ಯಾವ ಜಿಲ್ಲೆಯಲ್ಲಿಯೂ ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಪ್ರಾಮಾಣಿಕವಾಗಿ ಕಾಣುತ್ತಿಲ್ಲ ಎಂದು ಹೊರ ಜಿಲ್ಲೆಯ ನಾಗರಿಕರು ಪ್ರಶಂಸೆ ವ್ಯಕ್ತಪಡಿಸುತ್ತಿದ್ದಾರೆ.

ಹಾಗಾಗಿ ವಲಸೆ ಕಾರ್ಮಿಕ ಬಂಧುಗಳೇ.. ದಯವಿಟ್ಟು ಅನ್ನದ ಬೆಲೆ ಅರ್ಥ ಮಾಡಿಕೊಳ್ಳಿ..! ಆಹಾರ ಪೋಲು ಮಾಡಬೇಡಿ..! ಹೊಟ್ಟೆ ತಣಿವಷ್ಟು, ತೇಗುವಷ್ಟು ಸೇವಿಸಿರಿ.

ಆದರೆ ಆಹಾರ ಪೊಟ್ಟಣಗಳನ್ನು ಆಶಾಭಾವನೆಯಿಂದ ಅಧಿಕವಾಗಿ ಪಡೆದು ಎಸೆಯಬೇಡಿ.

ಇದೀಗ ಉಡುಪಿಯ ನಗರದ ಅಲ್ಲಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದಿರುವ ಆಹಾರದ ಪೊಟ್ಟಣಗಳ ಕಂಡು, ಅನ್ನಬ್ರಹ್ಮನ ನಾಡಿನ ನಾಗರಿಕರು ಬೇಸರಿಸಿಕೊಂಡಿದ್ದಾರೆ.

ದಯವಿಟ್ಟು ಅರ್ಥಮಾಡಿಕೊಳ್ಳಿ ಎಂದು ಸಮಾಜಸೇವಕ ನಿತ್ಯಾನಂದ ಒಳಕಾಡು ಅವರು ಈ ಮೂಲಕ ವಿನಮ್ರವಾಗಿ ವಿನಂತಿಸಿಕೊಂಡಿದ್ದಾರೆ.

ಬರಹ: ಪ್ರಮೋದ್ ಸುವರ್ಣ ಕಟಪಾಡಿ, ಉಡುಪಿ