ಮಂಗಳೂರು: ತಿಂಗಳ ಹಿಂದೆ ಮಂಗಳೂರು ನಗರದ ಚಿನ್ನಾಭರಣ ಅಂಗಡಿಯ ಸಿಬ್ಬಂದಿಯ ಕೊಲೆ ಪ್ರಕರಣದ ಆರೋಪಿಯನ್ನು ಕೇರಳ ಪೊಲೀಸರ ಸಹಾಯದಿಂದ ಬಂಧಿಸಿದ್ದೇವೆ ಎಂದು ಮಂಗಳೂರು ನಗರ ಪೊಲೀಸ್‌ ಆಯುಕ್ತ ಕುಲದೀಪ್ ಕುಮಾರ್‌ ಜೈನ್‌ ತಿಳಿಸಿದ್ದಾರೆ.

ನಗರದ ಪೊಲೀಸ್‌ ಆಯಕ್ತರ ಕಚೇರಿಯಲ್ಲಿ ಸುದ್ದಿಗೋಷ್ಟಿಯಲ್ಲಿ ಮಾಹಿತಿ ನೀಡಿದ ಅವರು, ಫೆ.3 ರಂದು ಮಂಗಳೂರು ಜ್ಯುವೆಲರ್ಸ್ ಹೆಸರಿನ ಅಂಗಡಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ರಾಘವೇಂದ್ರ ಆಚಾರ್ಯ ಎಂಬುವರನ್ನು ಅಪರಿಚಿತ ವ್ಯಕ್ತಿಯೊಬ್ಬರು ಹತ್ಯೆ ಮಾಡಿ, ಪರಾರಿಯಾಗಿದ್ದರು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸಿದ ಪೊಲೀಸರು ಕೊಚ್ಚಿ ಮೂಲದ ಶಿಫಾಝ್‌(31)ನನ್ನು ಕಾಸರಗೋಡು ಜಿಲ್ಲಾ ಪೊಲೀಸರ ಸಹಕಾರದಿಂದ ಬಂಧಿಸಿದ್ದಾರೆ.

ಕೊಲೆಗೈದು ನಡೆದುಕೊಂಡೇ ಹೋಗಿದ್ದ ಆರೋಪಿ
ಆರೋಪಿ ಶಿಫಾಝ್‌ ಮಂಗಳೂರು ಜ್ಯುವೆಲರ್ಸ್ ಅಂಗಡಿ ಸಿಬ್ಬಂದಿ ರಾಘವೇಂದ್ರ ಆಚಾರ್ಯನನ್ನು ಕೊಲೆಗೈದು ಒಂದಷ್ಟು ದೂರ ನಡೆದುಕೊಂಡೇ ಹೋಗಿ ಅಲ್ಲಿಂದ ರಿಕ್ಷಾ ಬಳಸಿ ನಗರದ ಹೊರವಲಯಕ್ಕೆ ತಲುಪಿ ಬಸ್‌ ಮೂಲಕ ಕಾಸರಗೋಡಿಗೆ ಹೋಗಿದ್ದನು.

ಕಾಸರಗೋಡಿನಿಂದ ರೈಲಿನ ಮೂಲಕ ಕೊಚ್ಚಿಗೆ ಕಾಲ್ಕಿತ್ತಿದ್ದನು ಎಂದು ಪೊಲೀಸ್‌ ತನಿಖೆ ವೇಳೆ ಬಯಲಾಗಿದೆ. ಸದ್ಯ ಈ ಬಂಧಿತ ಆರೋಪಿಯ ವಿರುದ್ದ ಪ್ರಕರಣಗಳು ದಾಖಲಾದ ಬಗ್ಗೆ ಮಾಹಿತಿಯಿಲ್ಲ. ಇದೀಗ ಈ ಬಗ್ಗೆ ನೆರೆರಾಜ್ಯ ಹಾಗೂ ಉಳಿದ ಜಿಲ್ಲೆಯ ಪೊಲೀಸರಿಗೆ ಮಾಹಿತಿ ನೀಡಲಾಗಿದೆ.

ಮಧ್ಯಾಹ್ನದ ವೇಳೆ ಒಂಟಿ ಸಿಬ್ಬಂದಿಯಿದ್ದ ಅಂಗಡಿಗಳೇ ಈತನ ಟಾರ್ಗೆಟ್‌
ಆರೋಪಿ ಶಿಫಾಝ್‌ ಮಧ್ಯಾಹ್ನದ ವೇಳೆಯಲ್ಲಿ ಅತ್ಯಂತ ವಿರಳ ಗ್ರಾಹಕರಿರುವ ಜ್ಯುವೆಲ್ಲರಿ ಶಾಪ್‌ಗಳನ್ನು ಟಾರ್ಗೆಟ್‌ ಮಾಡುತ್ತಿದ್ದ.

ಇದೇ ವೇಳೆ ಒಬ್ಬರೇ ಸಿಬ್ಬಂದಿ ಇರುವ ಶಾಪ್‌ಗಳನ್ನು ನೋಡಿಕೊಂಡು ಗ್ರಾಹಕನ ಸೋಗಿನಲ್ಲಿ ಅಂಗಡಿಯೊಳಗೆ ನುಗ್ಗುತ್ತಿದ್ದ. ಅದರಂತೆ ಫೆ.3 ರಂದು ರಾಘವೇಂದ್ರ ಅವರು ಒಬ್ಬಂಟಿಯಾಗಿದ್ದನ್ನು ಖಾತ್ರಿ ಮಾಡಿಕೊಂಡಿದ್ದ ಆರೋಪಿ ಜ್ಯುವೆಲ್ಲರಿ ಒಳಗೆ ಹೋಗಿದ್ದ.

ಅಲ್ಲಿ ಸ್ವಲ್ಪ ಹೊತ್ತು ಗ್ರಾಹಕನಂತೆ ವರ್ತಿಸಿ ರಾಘವೇಂದ್ರ ಅವರು ಬೆನ್ನು ಹಾಕಿ ಒಳಹೋಗುತ್ತಿದ್ದಂತೆ ಅವರನ್ನು ಚಾಕು ಮೂಲಕ ಬೆದರಿಸಿ ಚಿನ್ನಾಭರಣ ಎಗರಿಸಲು ಮುಂದಾಗಿದ್ದಾನೆ. ಅಷ್ಟರದಲ್ಲಿ ಹೊರಗಿನಿಂದ ಜ್ಯುವೆಲ್ಲರಿ ಮಾಲಕ ಒಳಗೆ ಬರುತ್ತಿರುವುದನ್ನು ಕಂಡು ರಾಘವೇಂದ್ರ ಅವರನ್ನು ಕೊಲೆಗೈದು ನಿಮಿಷಗಳಲ್ಲಿ ಪರಾರಿಯಾಗಿದ್ದಾನೆ.

ಕ್ಲೂ ಕೊಟ್ಟ ಬ್ಯಾಗ್‌
ಕೊಲೆ ಪ್ರಕರಣ ಬಯಲಾಗುತ್ತಿದ್ದಂತೆ ತನಿಖೆಗಿಳಿದ ಪೊಲೀಸರು ಸಿಸಿಟಿವಿಯ ಆಧಾರದಲ್ಲಿ ಆರೋಪಿಯ ಚಹರೆಯನ್ನು ಪತ್ತೆ ಹಚ್ಚಿದ್ದರು. ಈ ಫೋಟೋವನ್ನು ಕಾಸರಗೋಡು ಜಿಲ್ಲೆ ಸೇರಿದಂತೆ ಕರ್ನಾಟಕದ ವಿವಿಧ ಜಿಲ್ಲೆಗಳಲ್ಲಿ ಛಾಯಾಚಿತ್ರದ ಭಿತ್ತಿಪತ್ರ ಹಚ್ಚಿದ್ದರು.

ಇದರ ಆಧಾರದಲ್ಲಿ ಕೇರಳ ಪೊಲೀಸರು ಕಾಸರಗೋಡು ಪೇಟೆಯಲ್ಲಿ ಇದೇ ಬ್ಯಾಗ್‌ ಹಾಕಿ ತಿರುಗಾಡುತ್ತಿದ್ದ ಹಾಗೂ ಭಿತ್ತಿಪತ್ರದಲ್ಲಿರುವ ಚಹರೆಯನ್ನು ಹೋಲುವಂತಹ ಆರೋಪಿಯ ವಿಚಾರಣೆಗೊಳಪಡಿಸಿದಾಗ ಕೊಲೆ ಕೃತ್ಯ ಬಯಲಾಗಿದೆ.

ಮೂರು ಪದರದ ಬಟ್ಟೆ ಹಾಕುತ್ತಿದ್ದ ಶಿಫಾಝ್‌
ಆರೋಪಿಯ ಯಾವಾಗಲೂ ಮೂರು ಪದರದ ವಸ್ತ್ರಗಳನ್ನು ಧರಿಸುತ್ತಿದ್ದ. ಕಾರಣ ಯಾವುದೇ ಕೊಲೆ ಕೃತ್ಯ ಸಂದರ್ಭ ರಕ್ತದ ಕಲೆಗಳು ಆದಾಗ ತಕ್ಷಣ ಬಟ್ಟೆ ಬದಲಿಸಲು ಹಾಗೂ ಕೃತ್ಯ ನಡೆಸಿ ಪರಾರಿಯಾಗುವ ವೇಳೆ ತನ್ನ ಗುರುತು ಸಿಗಬಾರದೆಂದು ಬೇರೆ ಬೇರೆ ಬಣ್ಣದ ಮೂರು ಬಟ್ಟೆಗಳನ್ನು ಒಂದರ ಮೇಲೊಂದರಂತೆ ಧರಿಸುತ್ತಿದ್ದ ಎಂಬ ಅಂಶ ತನಿಖೆ ವೇಳೆ ಬಯಲಾಗಿದೆ. ಜೊತೆಗೆ ಕಾಸರಗೋಡು ಪೊಲೀಸರು ಬಂಧಿಸುವ ವೇಳೆಯೂ ಆತ ಮೂರು ಪದರ ವಸ್ತ್ರ ಧರಿಸಿ ದರೋಡೆಗೆ ಹೊಂಚು ಹಾಕಿದ್ದ ಎಂದು ತನಿಖೆಯಲ್ಲಿ ಬಾಯಿಬಿಟ್ಟಿದ್ದಾನೆ.

ಆರೋಪಿ ಕೈಯಲ್ಲಿತ್ತು ಆಟಿಕೆ ಪಿಸ್ತೂಲ್‌
ಆರೋಪಿ ಶಿಫಾಝ್‌ ಕೊಲೆ ಕೃತ್ಯಕ್ಕೆ ಆಟಿಕೆ ಪಿಸ್ತೂಲ್‌ ಹಾಗೂ ಪೆಪ್ಪರ್‌ ಸ್ಪ್ರೇ ಬಳಸುತ್ತಿದ್ದ ಎಂಬ ಅಂಶವೂ ವಿಚಾರಣೆ ವೇಳೆ ಬಯಲಾಗಿದೆ.

ಮಂಗಳೂರಿನಲ್ಲೇ ಎಂಜನಿಯರಿಂಗ್‌ ಮಾಡಿದ್ದ ಆರೋಪಿ
ಶಿಫಾಯ್‌ ಮಂಗಳೂರು ಹೊರವಲಯದ ಖಾಸಗಿ ಕಾಲೇಜಿನಲ್ಲಿ ಎಂಜಿನಿಯರಿಂಗ್‌ ಮಾಡಿದ್ದ, ತದನಂತರ ವಿದೇಶಕ್ಕೆ ತೆರಳಿ ಅಲ್ಲೇ ಉದ್ಯೋಗ ಮಾಡಿ ಮತ್ತೆ ಊರಿಗೆ ವಾಪಾಸಾಗಿದ್ದ ಎಂದು ತನಿಖೆ ವೇಳೆ ತಿಳಿದು ಬಂದಿದೆ.

ಕೇರಳ ಪೊಲೀಸರಿಗೆ ಪ್ರಶಂಸನಾ ಪತ್ರದ ಮೂಲಕ ಗೌರವಿಸಿದ ಮಂಗಳೂರು ನಗರ ಪೊಲೀಸ್‌

ಈ ಪ್ರಕರಣದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಕೇರಳ ಪೊಲೀಸ್‌ ಸಿಬ್ಬಂದಿಗೆ ಪ್ರಶಂಸನಾ ಪತ್ರ ನೀಡಿ ಮಂಗಳೂರು ನಗರ ಪೊಲೀಸ್‌ ಆಯುಕ್ತ ಗೌರವಿಸಿದ್ದಾರೆ. ಜೊತೆಗೆ ಈ ತನಿಖೆಯಲ್ಲಿ ಭಾಗವಹಿಸಿದ್ದ ಮಂಗಳೂರು ನಗರ ಪೊಲೀಸರಿಗೆ 25 ಸಾವಿರ ರೂ ನಗದು ಬಹುಮಾನ ಘೋಷಿಸಿದರು. ಈ ಪ್ರಕರಣದ ತನಿಖೆಗಾಗಿ 8 ತಂಡಗಳನ್ನು ರಚಿಸಿದ್ದರು.