ಎಲ್ಲಿದೆ ಮಾನವೀಯತೆ..? ಕೆಲವೊಂದು ವಿಕೃತ ಮನಸ್ಸುಗಳಲ್ಲಿ ನಶಿಸಿ ಹೋಗುತ್ತಿದೆಯಾ..??

ಮಂಗಳೂರು: ಕರಾವಳಿಯ ಹೆಮ್ಮೆಯ ಚಾನೆಲ್ ನಮ್ಮ ಕುಡ್ಲ 24×7 ವಾಹಿನಿಯಲ್ಲಿ ಪ್ರಸಾರವಾದ ‘ಪ್ರೈಮ್ ಡಿಬೆಟ್’ನಲ್ಲಿ ‘ದುಬೈ ಟ್ರ್ಯಾಜಿಡಿ’ ಎಂಬ ವಿಚಾರದ ಬಗ್ಗೆ ಸಿರಾಜುದ್ದಿನ್ ಪರ್ಲಡ್ಕ ಎಂಬ ವೀಕ್ಷಕರೊಬ್ಬರು ಪ್ರತಿಕ್ರಿಯೆ ನೀಡಿದ್ದಾರೆ.

ಆ ಕಾರ್ಯಕ್ರಮಕ್ಕೆ ಬಂದಂತಹ ಕರೆಗಳಲ್ಲಿ ಹಲವರು ಮಾನವೀಯತೆ ದೃಷ್ಟಿಯಿಂದ ಮಾತನಾಡಲಿಲ್ಲ ಎಂದವರು ಬೇಸರ ವ್ಯಕ್ತಪಡಿಸಿದ್ದಾರೆ.

ಹೌದು ದುಬೈನಿಂದ ಮಂಗಳೂರಿಗೆ ಆಗಮಿಸಿದ 179 ಪ್ರಯಾಣಿಕರಲ್ಲಿ 16 ಮಂದಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಆತಂಕ ಮನೆ ಮಾಡಿದೆ.

ಈ ಹಿನ್ನಲೆಯಲ್ಲಿ ಜನತೆ ಕೂಡ ವಿದೇಶದಲ್ಲಿದ್ದವರು ಇಲ್ಲಿ ಬಂದಿದ್ದು ತಪ್ಪು ಎಂಬುದಾಗಿ ಬಿಂಬಿಸಿದ್ದಾರೆ.

ಈ ನಿಟ್ಟಿನಲ್ಲಿ ಸಿರಾಜುದ್ದಿನ್ ಅವರು ತಮ್ಮ ಅಭಿಪ್ರಾಯ ಹೊರಹಾಕಿದ್ದಾರೆ.

ಸಿರಾಜುದ್ದಿನ್ ಪರ್ಲಡ್ಕ ಬರೆದ ಪತ್ರ ಇಲ್ಲಿದೆ ನೋಡಿ….

“’ನಮ್ಮ ಕುಡ್ಲ 24X7′ ಚಾನೆಲಿನಲ್ಲಿ ಮೇ 15 ರಂದು ನಡೆದ ಪ್ರೈಮ್ ಡಿಬೇಟಿನಲ್ಲಿ ಕೆಲವೊಂದು ಕಾಲರ್ ಗಳ ಅಮಾನವೀಯ ಮನಸ್ಥಿತಿಯನ್ನು ನೋಡಿ ತುಂಬಾ ಬೇಸರವಾಯಿತು.

ಅನಿವಾಸಿ ಪ್ರವಾಸಿಗರು ಕೆಲಸವಿಲ್ಲದೇ ರೂಮು ಬಾಡಿಗೆ ಕೊಡಲು ಹಾಗೂ ಎರಡೊತ್ತಿನ ಊಟಕ್ಕೂ ಪರದಾಡುತ್ತಿರುವಾಗ ಈ ರೀತಿಯ ವಿಷಕಾರಿ ಚಿಂತನೆ ನಿಜಕ್ಕೂ ಖೇದಕರ.

ವಿದೇಶದಿಂದ ಊರಿಗೆ ಇವಾಗ ಬರಬೇಡಿ ಎನ್ನುವವರೇ ಕೇಳಿ, ‘ಇಲ್ಲಿ (ವಿದೇಶದಲ್ಲಿ) ವಿಸಿಟ್ ವೀಸಾದಲ್ಲಿ ಎರಡು ಮೂರು ತಿಂಗಳಿಗಾಗಿ ತಮ್ಮ ಮಕ್ಕಳನ್ನು ನೋಡಲು ಬಂದು ಸಿಲುಕಿರುವ ಅದೆಷ್ಟೋ,

ಹಿರಿಯ ತಂದೆ-ತಾಯಂದಿರು, ಎರಡು ಮೂರು ತಿಂಗಳಿಗೆ ಆಗುವಷ್ಟು ದೈನಂದಿನ ಔಷಧಿಗಳನ್ನು ತಂದಿರುವ ವಯಸ್ಸಾದ ಹಿರಿಯ ಜನರು, ಗರ್ಭಿಣಿ ಮಹಿಳೆಯರು,

ಕೆಲಸವೂ ಇಲ್ಲದೇ ಹಣವೂ ಇಲ್ಲದೇ ಕಂಗಾಲಾಗಿರುವ ಕಾರ್ಮಿಕರು, ಸೇಲ್ಸ್ ಮೆನ್ ಗಳು, ಮುಂತಾದ ನೌಕರಿಯಲ್ಲಿರುವವರು ಮಾತ್ರ ತಾಯ್ನಾಡಿಗೆ ಮರಳುತ್ತಿದ್ದಾರೇ ವಿನಃ, ರಜಾ ದಿನಗಳನ್ನು ಕಳೆಯಲು ಬರುವ ವಿಲಾಸಿಗಳಲ್ಲ.

ಈ ಮೇಲೆ ತಿಳಿಸಿದವರೆಲ್ಲರೂ ಇಲ್ಲಿ ಸಂಕಷ್ಟದಲ್ಲಿರುವಾಗ ತಮ್ಮ ತಾಯ್ನಾಡು ಹಾಗೂ ತಮ್ಮ ಮನೆಯವರನ್ನು ಸೇರಬೇಕಾದ ಅನಿವಾರ್ಯತೆ ಇದೆ”.

“ಅಲ್ಲದೇ ವಿಸಿಟ್ ವೀಸಾದಲ್ಲಿರುವವರು ಈ ಪರಿಸ್ಥಿತಿಯಲ್ಲಿ ಯಾವುದೇ ವೈದ್ಯಕೀಯ ಚಿಕಿತ್ಸೆ ಪಡೆಯುವ ಸ್ಥಿತಿಯಲ್ಲಿಲ್ಲ.

ಯಾಕೆಂದರೆ ವಿಸಿಟ್ ವೀಸಾದವರಿಗೆ ಇಲ್ಲಿನ ಇನ್ಶೂರೆನ್ಸ್ ಸೌಲಭ್ಯ ಲಭ್ಯವಿಲ್ಲ. ಹಾಗಾಗಿ ಸಂಪೂರ್ಣ ವೆಚ್ಚವನ್ನು ಭರಿಸಬೇಕಾಗುತ್ತದೆ.

ವೈದ್ಯರ ಶುಲ್ಕವೇ 300 ದಿರ್ಹಮ್ಸ್ (ಸರಿಸುಮಾರು 6000 ರೂಪಾಯಿ) ಮತ್ತು ಔಷಧಿಗೆ ಬೇರೆಯೇ ಪಾವತಿ ಮಾಡಬೇಕಾಗುತ್ತದೆ.

ಏನಿದ್ದರೂ ಕಡಿಮೆಯೆಂದರೆ ಒಮ್ಮೆಗೆ ಸರಿ ಸುಮಾರು 10000 ರೂಪಾಯಿ ಬೇಕಾಗುತ್ತದೆ. ಇದೆಲ್ಲವನ್ನೂ ಹೇಗೆ ನಿಭಾಯಿಸಬಹುದೆಂದು ನೀವೇ ಆಲೋಚಿಸಿ”.

“ವಿದೇಶಗಳಿಂದ ಬಂದಿಳಿದವರೆಲ್ಲರನ್ನೂ ಕೊರೊನಾ ಮಹಾಮಾರಿಯಂತೆ ಕಾಣುವ ಜನರೇ, ಇಲ್ಲಿ ಕೇಳಿ, ಅವರು ಯಾವುದೇ ತಪ್ಪು ಮಾಡಿಲ್ಲ.

ಎಲ್ಲವೂ ಸೃಷ್ಟಿಕರ್ತನ ಲೀಲೆ. ಮಾನವ ನೆಪ ಮಾತ್ರ. ಅವರ್ಯಾರೂ ತಮ್ಮಿಷ್ಟದಂತೆ ತಿರುಗಾಡಲಿಲ್ಲ. ಜಿಲ್ಲಾಡಳಿತ ನಿರ್ದೇಶಿಸಿದಂತೆ ಕ್ವಾರಂಟೈನ್ ಮಾಡುತ್ತಿದ್ದಾರೆ.

ಪರೀಕ್ಷೆಗೆ ಒಳಪಡಿಸಿ ವೈರಸ್ ಪತ್ತೆಯಾದರೆ ಆಸ್ಪತ್ರೆಗೆ ಸೇರಿಸಿ ಚಿಕಿತ್ಸೆ ಕೊಡಿಸುತ್ತಾರೆ. ಹಾಗಂತ ಅವರು ಅದನ್ನು ಊರಿಡೀ ಪಸರಿಸುತ್ತಾರೆಯೇ.?.

‘ಇಲ್ಲಿ (ವಿದೇಶದಲ್ಲಿ) ಅದೆಷ್ಟೋ ಸಲ ನಾನು ಕೂಡಾ ಊರಿನ ಕೆಲವರು ಪಾಸಿಟಿವ್ ಬಂದವರಿಗೆ ಆವಶ್ಯಕ ವಸ್ತುಗಳನ್ನು ವಿನಂತಿ ಮಾಡಿದಾಗ ಅವರ ರೂಮಿನ ಬಳಿ, ಆಸ್ಪತ್ರೆಯ ಬಳಿ ತೆರಳಿ ನೀಡಿದ್ದೇನೆ.

ನಾವು ಪಾಲಿಸಬೇಕಾದ ಮುಂಜಾಗ್ರತಾ ಕ್ರಮಗಳನ್ನು ಪಾಲಿಸಿದರಾಯಿತು. ನಮ್ಮಲ್ಲಿ ಮಾನವೀಯತೆ ಎಂಬುವುದು ಇರಲಿ.

ವಿನಾಕಾರಣ ಭಯದ ವಾತಾವರಣ ಸೃಷ್ಟಿಸದೇ ಮುಂಜಾಗ್ರತಾ ಕ್ರಮಗಳನ್ನು ಪಾಲಿಸಿಕೊಂಡು ಈ ಮಹಾಮಾರಿಯ ನಿರ್ಮೂಲನೆಯಲ್ಲಿ ಕೈ ಜೋಡಿಸೋಣ.

ಎಲ್ಲರೂ ನಮ್ಮವರೇ. ಪರಸ್ಪರ ಅನ್ಯೋನ್ಯತೆ ಹಾಗೂ ಸೌಹಾರ್ದತೆಯಿಂದ ಸಹೋದರತ್ವದಿಂದ ಬಾಳೋಣ”.